絲絲講場：Groupon楊聖武創業先預輸
百分百港產嘅團購網站uBuyiBuy，由於獲團購網巨頭Groupon收購，已正式變身Groupon香港，uBuyiBuy創辦人之一嘅楊聖武（Danny）亦正式成為Groupon香港行政總裁，印證了香港創業嘅成功例子。Danny坦言，創業時「抄」吓他人嘅成功模式不一定是壞事，最重要是決心與信心！
Danny憶述兩年前同拍檔歐致恒（Nelson），喺美國計劃返港成立uBuyiBuy時，其實就係決心要複製Groupon嘅業務模式，將公司發展為「港版Groupon」，務求搶先一步爭奪喺香港嘅龍頭地位，待Groupon即使來港大展拳腳都會首先考慮同自己合作，最終亦如當初預計，於是雙方一拍即合，Groupon成為uBuyiBuy嘅大股東，以Danny為首嘅管理層亦繼續保留持股，並負責Groupon香港嘅發展。
三十出頭 3次創業
Danny雖然只係三十出頭，但唔講唔知uBuyiBuy原來已經係佢第三次創業，佢第一次創業原來係靠讀書兼職存下嘅資金，在美國引入「許留山」嘅特許權，美國嘅「許留山」獲人收購後，佢就將資金投入經營酒店家具嘅生意，家具生意有錢賺，佢就把錢投資成立uBuyiBuy，過程聽落好似滾雪球咁簡單，但其實當中是要靠精密嘅部署同決心嚟配合。
佢更話：「uBuyiBuy開業幾個月就收支平衡又被人收購，好多人都以為團購網好容易成功，但其實喺開業前，我哋喺Business Plan預留足夠嘅錢，就連萬一創業失敗，要返出嚟打工，都已作好充分心理準備！」創業要成功，其實唔係表面睇咁簡單。
余絲韻