QE2落實，熱錢氾濫，港股狂升，大行紛紛唱好港股會見二萬九。立法會議員詹培忠一向牙擦，佢話喺今年三月已經睇好港股會見二萬六，自嘲雖然係早咗預測，但係估啱喎！詹議員果然夠「寸」，不過佢亦奉勸股民要執生。
詹培忠話喺今年農曆新年後，佢已經同經紀講，話睇好港股見二萬六。佢仲忍唔住「寸」嗰啲所謂專家，話要做專家就唔好估錯，錯得就唔係專家。「金牌莊家」果然係牙尖嘴利！
雖然依家港股未達佢嘅二萬六目標，但近期已升咗唔少，佢就奉勸股民要緊記，當街市阿叔阿嬸都講股票時，大家就要執生，不過佢認為依家港股仍未去到瘋狂狀況。
港股仲有冇力再升？佢就冇預測到，只係話股市受好多人為因素影響，但佢預計二○一六年金融市場會有大波動。佢幾時做咗「神算」，連二○一六年都估到有大事發生？佢解釋話只係因為每10年市場都有大波動，好似八七年股災、九七亞洲金融風暴、○八年金融海嘯，歷史只係不斷重複。
佢仲話港股近期雖然受惠於熱錢過多，但都唔夠澳門賺錢快。一向對賭錢好有興趣嘅佢，估計今年澳門政府嘅博彩稅收入多達700億元，稅收分分鐘多過香港。
佢又重提「港股直通車」，話內地人可以直接買港股係遲早嘅事，到時港股想唔升都難！
余絲韻