中國證券登記公司（下稱中登）「擺烏龍」，搞到投資者一頭霧水！事緣中登公司將內地3隻中小板未解禁嘅股份提前作流通股，原來係佢哋系統處理出現偏差，將「未解禁」嘅股份當為「解禁」，掀起一場小風波，幸好呢幾間上市公司規模唔大，否則真係會引起市場大混亂！
有內地記者翻查公司第三季季報時，發現其中一間叫閏土股份嘅公司，將佢4家社保基金股東所持嘅539.24萬股由「未解禁」列為「解禁」，搞到投資者以為呢批股份被基金清倉。話晒社保基金向來係基金嘅風向標，消息一出，梗係引起市場哄動，而且唔單只一間公司，仲有3間公司嘅未解禁股都被提早「解禁」。呢位記者打電話問呢啲公司，細問之下，原來公司嘅股東名冊係直接來自中登公司。
中登公司就解釋，由於呢4間公司股票係十月八日起解禁，而撞啱「十‧一」黃金周假期，所以系統喺九月三十日收市後，就要處理股東解禁股份嘅數據，事有湊巧，九月三十日係第三季度最後一日，所以第三季報顯示嘅數據有誤導之嫌，該批股份實際上根本未曾沽出街。
余絲韻