投効德州儀器「破戒」
放眼全球，OT文化喺各大城市盛行，港人更加係表表者。張忠謀早前就同大家分享佢打工嘅理念，就係「有效率」咁做「啱」嘅嘢，佢話波士有八成責任決定邊啲係啱嘅嘢，但做嘢有冇效率，個人亦有八成責任。
出嚟社會工作五十幾年，張忠謀好自豪咁話，「無論係做基層工程師抑或總經理、董事長，我每星期嘅工作時間都唔超過50個鐘。」但佢好坦白講畀大家知，佢亦曾經變咗工作狂，佢去德州儀器工作嘅頭半年，因為睇到立功上位嘅機會搏命做，而呢半年亦成為佢「唯一嘅例外」。
放工後會做乜？張忠謀就揀咗一邊聽音樂，一邊睇書，佢太座就會喺旁邊畫畫。呢啲咪係生活情趣囉，第日返工都醒神啲。
余絲韻