無論搭地鐵、巴士甚至係行街，好多人都會攞住部手機篤篤吓上網，絲絲尋日與雅虎香港董事總經理蔡寶德（Alfred）傾開偈，佢話最近嘅統計數字顯示，香港嘅手機上網總用量，竟然拍得住人口較香港多逾3倍嘅台灣，真係有啲意外。
Alfred話台灣嘅人口比香港多，多年來都認為台灣嘅互聯網市場發展潛力大過香港，但本港手機上網嘅驚人用量，正好顯示香港喺互聯網發展上仍有本身嘅強勢，所以佢哋多年嚟一直積極向市場推廣互聯網廣告及互動市場推廣嘅業務，今時今日啲企業已經唔會再問「點解要用互聯網嚟推廣生意」，反而主動搵上門問「點樣用互聯網嚟推廣生意」。
講開互聯網廣告，好多人都話雅虎正受Google、Facebook、Twitter等搜尋或社交網站嘅挑戰，不過Alfred就話至少喺香港嚟講，雅虎所受嘅威脅並唔係咁大，按調查公司嘅統計，雅虎香港嘅入門網站對本港網民嘅接觸率仍達82%，搜尋功能對本港網民嘅接觸率達70%，並成功保持本港入門網站嘅一哥地位。佢哋嘅團隊一直努力開拓新嘅網上推廣技術及產品，好似明年推出嘅「Smart Ads」就可透過分析網民登入網站嘅慣性，針對性咁向網民作相應嘅廣告宣傳及推廣。