絲絲講場：友邦搖籃新星夠威水
友邦連續13年搞青年領袖培訓獎勵計劃，至今已培訓咗超過350位明日之星，佢哋畢業後投身不同行業，有做醫生亦有從商，投身保險嘅反而唔多。但老友同絲絲講，話過去有兩位完成培訓嘅學生，畢業後加入友邦，而且發展得相當唔錯，短短時日已入咗代表優秀保險從業員嘅「百萬圓桌會」，可謂相當威水。
培育本地大學生
友邦依家忙緊搞上市，睇番呢個活動，證明佢哋冇忽略其他有意義嘅嘢。青年領袖培訓獎勵計劃今年已經係第13屆，主要對象係本地大學一、二年級生，希望培育佢哋具備成為未來領袖嘅質素及態度。
友邦保險首席市場總監李滿能話，年輕人作為社會未來棟樑，當然要悉心栽培，近年愈來愈多年輕人關心及參與社會事務，可見佢哋對香港有強烈歸屬感，希望今年參與計劃嘅28位學生將來可貢獻社會。佢仲話今年適逢上海世博，所以特登安排咗個上海研習遊，參觀世博之餘，仲有得參觀上海寶馬車廠，令學生擴闊眼界。
余絲韻