絲絲講場：石禮謙睇多家上市公司
德祥地產（00199）公布請咗位新嘅副主席兼獨立非執董，佢就係立法會議員石禮謙，唔講唔知，原來石禮謙喺N咁多家上市公司有職務，數吓數吓就數到15家。去年「股壇長毛」David Webb曾質疑石禮謙身兼咁多職，到底為邊個服務，估唔到佢依家又兼多一職，總共喺16家上市公司有職位。
任德祥地產副主席
石禮謙本身係地產及建築界功能組別議員，所以佢做董事嘅公司亦以地產股為主，絲絲睇到佢啲董事銜頭，真係水蛇春咁長，由內地房地產公司碧桂園（02007）以至本港嘅房地產信託冠君（02778）都有，佢亦係德祥企業（00372）嘅獨立非執董；不過，亦有啲係同佢本業冇咁「貼近」嘅公司，例如泰山石化（01192）及澳博（00880）。絲絲睇過德祥、碧桂園及冠君嘅年報，發現石禮謙都好盡責，差不多出席晒所有會議，而港鐵（00066）嘅7次會議佢都出席咗6次，都算勤力。
今次石禮謙係接替請辭嘅喬小東做德祥地產副主席，兼做埋非執董，每年又袋多20萬元。唔知佢點樣分配時間先可同時兼顧咁多職務呢？絲絲嘗試過Call佢，不過就未搵到佢。
余絲韻