有內地媒體早前報道話，國家電網公司做咗個調查，發現內地有6,540萬套房嘅電錶連續6個月讀數係「零」。有人喺屋企冇理由唔使用電，除非係冇人住嘅空置單位，呢個數據引起了各方爭論，認為內地炒樓嚴重，好多人買房為咗等好時機出貨，唔會出租，所以冇用過電。喺網上引發好多討論後，國家電網公司終於出聲，話從來冇做過呢個統計。
如果有6,540萬套空置房，以每套房有3個人入住計，足夠2億人居住。有內地媒體話數據係來自國家電網，掌控全國電錶使用嘅國家電網公司就澄清話根本冇做過統計。
絲絲知道，有經濟學者喺博客回應話呢個數字不合常理，除非由九五年以來，所有新建嘅房屋都空置咗，先會累積達6,540萬套空置房。有學者亦質疑呢個數據，話每個城市都有空置房嘅情況，理想嘅空置率唔係零，而係一個合理嘅水平。唔知係咪有人借題發揮作個數出嚟，叫人關心吓內地樓市炒賣情況。
余絲韻