好多金融機構以及其掌舵人嘅「貪錢」形象深入民心，相信有排都洗唔甩呢個污名，身為牧師嘅滙控（00005）主席葛霖唔知係咪心急想幫銀行業搞好形象，就連已故著名經濟學大師佛利民講過嘅說話都攞番出嚟反駁。
一代經濟學大師兼且係諾貝爾獎得主嘅佛利民，當年講過「無免費午餐」呢一句話，成為咗多年來嘅流行金句，亦好多人認同此話。
呢位大師亦講過「企業嘅社會責任就係賺錢」，葛霖喺一個論壇趁機反駁，話企業固然需要賺錢，但呢個只係副產品、一個成功嘅標記，但並非代表一切，亦唔係企業存在嘅理由。
經歷過金融海嘯後，葛霖話企業以及佢哋嘅董事會一定從過去錯誤中吸取到教訓，亦會考慮到更廣泛層面嘅利益相關者，而唔係單單揸住企業股權嘅人；佢亦知企業需要基於本身承受風險情況來賺取理想回報，但認為企業亦要與利益相關者，好似僱員、客戶及社區建立長遠而持續嘅關係。
對於佛利民大師話企業唔應該用股東資金做慈善嘅工作，又話企業冇呢個慈善嘅身份，葛霖當然又好唔認同。大家都有眼睇，「大笨象」在全球做咗咁多善事，喺賺錢之餘亦不忘盡其社會企業嘅責任。
余絲韻