絲絲講場：港龍25周年攞獎賀壽
唔經唔覺港龍航空喺香港原來已成立廿五年，呢個咁有意義嘅日子，公司正為其中一架航機重新塗抹「特別版」機身，亦將於七月公布一系列機票折扣優惠慶祝生日。
首四月客量大增
港龍行政總裁唐偉邦話，早前去咗德國接受由英國獨立顧問公司Skytrax首度頒發嘅「全球最佳區域航空公司」殊榮，呢個獎項由全球逾一千七百萬名旅客按登機及機艙服務、餐飲等三十個項目評分選出，真係雙喜臨門。
受惠於上海世博嘅舉行，港龍今年首四個月嘅客量較去年同期有雙位數增長，當中前往上海嘅航班更要轉用大機應付需求。唐偉邦估計呢個勢頭會繼續落去，未來兩、三個月飛上海嘅機票預訂較去年同期有四成增長，睇嚟要繼續將部分班次轉用大機應付。
佢哋嘅機隊規模繼續擴充，七至八月就會接收兩架新飛機，至於航班亦會隨着旅遊旺點而增加，好似前往武漢及高雄嘅班次，就係配合高鐵及兩岸直航帶動嘅人流。
余絲韻