尋日絲絲經過旺角行人天橋，見到聚集咗一班人，以為有人街頭表演，望真啲原來大家都盯實恒指報價，嗰個LED恒指顯示屏夠晒大，有恒指及股份即時報價、五大成交及五大升幅榜等，所處位置開揚，原來係光大證券擺出嚟嘅。
光大證券（香港）執行董事劉家業透露，呢間旺角分行喺本月先開張，係光大證券喺香港嘅第3間分行，呢個靚位係同業主傾咗好耐先攞到。以往光證主力做機構投資者生意，前兩年開始拓展散戶市場，喺紅磡及北角開分行，不過劉老闆鍾意按部就班，約每隔一年等分行上咗軌道、營運穩定落嚟，先會考慮再開多間。
劉老闆仲話，要令嗰塊報價板清晰顯示都好考功夫，朝早及夜晚要調校光暗，數字顏色配搭都諗過度過，為咗響應環保，報價板只會開到每晚11點鐘。
余絲韻