港股繼續沉悶，話說恒指收復番21,000點整整一個禮拜，但就悶足你一個禮拜，每日波幅唔夠200點，真係唔上唔落，玩殘班鑊鏟友，唔知追好定唔追好，結果個個你眼望我眼，排排坐等賽果。
大市無方向的確難炒，不過水尾追仙股，始終係不變嘅金科玉律。上個禮拜古晨就發覺唔少仙股鑊氣重現，估計係有資金開始埋位，由於啲仙股細細粒易炒起，發起威嚟隨時日日可以幾十個巴仙咁升，所以低位收集一下亦無妨。
國中（00202）去年開始進行股本重組以優化財務狀況，看來想大展拳腳，上個禮拜佢喺A股上市嘅附屬企業黑龍江水務，就率先集資7.5億元人仔，似乎有滿腹大計，睇怕國中完成股本重組之後，應該有大動作跟尾，股價隨時可以正式脫離仙班，暫時博佢炒上0.15元應該無難度，止蝕位可以考慮放喺0.082。
古晨