絲絲講場：黃鳴靠Sell太陽能

推節能樓盤受歡迎

黃鳴話太陽能推廣實在太難，就算有客話要裝太陽能熱水器，通常都畀開發商或物業公司阻撓，加上安裝太陽能熱水器要佔用戶外面積，開發商預留嘅面積實唔夠用。依家了解新能源嘅人唔多，傳統營銷方式效果有限。所以黃鳴就決定起棟節能樓，示範畀大家睇點樣慳家。

有「中國太陽能行業之父」稱譽嘅黃鳴，當初苦心鑽研太陽能，係因為驚個女第日冇能源用。為咗推廣太陽能熱水器，佢喺山東德州推出樓盤「蔚來城」，全部用地源熱泵、節能牆等環保技術。雖然建築成本比人哋貴40%，不過單位所有熱、暖、電、用水就平人哋70%。第一期已經賣晒，第二期就嚟推出。睇嚟佢呢招都幾掂。

余絲韻