絲絲講場：四叔屋企擺大壽墟冚
恒地（00012）一年一度嘅大日子又到，講緊嘅唔係公司成立周年或公布業績，而係集團Icon「四叔」李兆基喺本周日81歲大壽，集團上下呢幾日亦特別熱鬧及喜氣洋洋。
福臨門到會 擺13圍
四叔喺農曆正月廿九日出生，計番今年新曆就係三月十四日，每年四叔大壽，佢都例牌低調慶祝，只係相約親友及恒地高層到佢半山麥當勞道惠苑嘅豪宅食餐飯。
雖然四叔只邀請至親好友，但據聞今年都要擺成13圍，由「富豪飯堂」之稱嘅福臨門負責到會，而每年其親友都會送上超大蛋糕一個。
每周宴謝「賓卡」齊搵銀
絲絲相信四叔今年大壽最開心，因為仔仔家誠與新抱徐子淇去年同佢添多一位孫女，而且仍在繼續「努力」中，加上金融海嘯後樓股大反彈，四叔嘅身家應該已經收復失地，甚至可能膨脹咗唔少。
所以四叔呢排每逢周五，都會喺佢嘅飯堂國金軒設宴，請啲「賓卡」好友食飯，多謝佢哋幫自己搵錢，同埋做一周檢討。尋日國金軒就特製兩款壽包─傳統蓮蓉蛋黃壽包及富貴燕窩壽包，絲絲仲八到，四叔已陸續收到生日禮物，鮑參翅肚已經堆滿咗佢嘅辦公室。
余絲韻