本文重點
雖然係金頭髮藍眼睛，又係基督徒，宏利金融（00945）行政副總裁兼香港區首席行政總監何達德（Michael）原來都篤信風水，仲話之前搵人同佢睇過辦公室風水，之後健康真係好咗，所以佢九月搬去觀塘新Office時，都要搵番個風水大師指點吓。
Michael辦公室唔止風水好，其實佢腳頭都唔錯，因為佢帶領下宏利香港錄得創紀錄新高盈利，而且某程度因為歐美業務萎縮，香港區對集團貢獻高達33%，較以往幾年大約13%水平，進步非常多，大老闆實對佢讚不絕口。
Michael話宏利香港嚟緊除咗倚靠經紀外，仲會搵多啲獨立分銷渠道，例如獨立理財顧問、銀行咁，最近仲搵埋星展賣佢哋嘅保險產品。
唔止睇風水，Michael駐台灣時，按傳統睇人向鬼怪祈福，可能又係因為咁，所以任內四年喺台灣又做到好巴閉，保費增長逾十倍！
睇實大笨象放榜
大笨象周一派成績表，Michael話到時佢都要
到實一實，莫非佢都係小股東？Michael不置可否，但話因為滙豐保險係佢哋保險同強積金業務嘅一大對手，知己知彼，百戰百勝，當然要了解吓佢哋盤數做成點，未來又有咩新動向啦！
余絲韻