本文重點
中國人口龐大，好快就會面對人口老化問題，所以設立安全網，成立全民養老金就成為中央一個好頭痛嘅問題，絲絲聽保險界老行尊講，幾年前已經有保險公司研究過推行外國嗰套逆向按揭，諗住「以房養老」，等啲老人家可以靠層樓向保險公司拎錢安享晚年，但後來發現國情唔同，最終都搞唔成。
新生代要靠父母養
逆向按揭等業主到咗一定年紀後由保險公司每個月畀錢佢哋，到佢哋百年歸老之後就收咗間屋。但係依家中國好多年輕一代仲要靠父母養，同外國仔女大咗就講求獨立唔同，所以好多父母都要留番間屋畀佢哋。
老行尊又話，體制結構亦令逆向按揭難以執行，中國嘅樓市欠缺成熟嘅中介機構網絡，一旦業主百年歸老要收樓，樓市大跌會搞到保險公司好難管理啲資產，好難甩手出去，而且內地又缺乏投資工具去對沖個風險。
另一個阻力係中國無遺產稅，有別於外國將資產留畀下一代要交稅嘅規則，所以呢樣嘢喺中國幾方面嘅誘因都唔大，都係做唔成。
余絲韻