本文重點
早排「歐豬五國」（PIIGS）搞到環球股市大跌，豬仔嘅威力毋庸忽視，最近仲潮興埋「STUPIDs」，串連起其他歐洲國家，講法亦相當「寸」，依家絲絲一諗起歐洲國家唔係蠢就變咗豬，真係諷刺！
歐國畀人叫蠢豬
點樣解讀「STUPIDs」呢？相信心水清嘅讀者都估到七七八八，將西班牙（Spain）、土耳其（Turkey）、英國（UK）、葡萄牙（Portugal）、意大利（Italy）及杜拜（Dubai）呢6個國家第一個英文字母串連，就成為STUPIDs喇。
呢個咁搞鬼得意嘅叫法，係由金融機構諗出嚟嘅。依家歐洲國家畀人改晒口叫蠢豬仔，唔知當權嘅官員點諗，可能會覺得有啲唔多好聽，侮辱咗一世英名，不過絲絲又覺得叫法不失可愛，蠢豬仔都叫得幾親切吖！
話時話，其實今次金融海嘯源頭係來自美國，但好似直到依家都冇人諗點樣冠一個新花名畀佢，各位有諗頭嘅讀者不如諗吓有乜稱呼啱佢啦！
余絲韻