本文重點
融資融券係內地券商今年開拓米路嘅新業務，中國證監會偏偏揀喺年初七截止試點申請，為咗安心過年，班券商依家忙到一頭煙。事關重大，連申請文件都唔敢託運，一於買夠3張機票，親自拎去京城。
券商訂機票3人運送
有券商話已經訂咗3張今日飛北京嘅機票，要趁過年前將試點方案嘅申報資料報去畀證監，「咁樣就可以過個好年。」點解要訂3張飛？因為融資融券試點業務嘅申請文件好鬼多，又咁重要，點敢託運？惟有每人拎啲，所以咪需要3個人一齊去北京囉。
年初七係內地春節後第一日正式開工，但邊個夠膽喺截止申請最後一日至報名？大家都想輕輕鬆鬆、安安樂樂過年，梗係揀過年前交齊資料啦。一旦批咗，虎年分幾多花紅，可能要靠呢項新業務㗎！聽講最快喺下月初，首批試點嘅名單就會出爐，等咗咁多年，難怪班券商咁認真準備喇。
余絲韻