精學氣功做埋助教

David話佢有次游水時掛住諗嘢，諗吓諗吓就成個頭撞咗落泳池邊！絲絲都戥佢一額汗，如果係游泳健將，撞落池邊分分鐘「見紅」都有份，不過見David依家個頭好光滑冇傷口，估佢應該都係撞親小小冇大礙。

David話其實好多運動都需要思考，好似另一樣佢至愛嘅高爾夫球運動，佢話由第一個洞打到最尾個洞，個腦都要不停思考，真係全方位鍛煉。佢仲有另一樣興趣，相信冇乜人估到，答案就係氣功，依家仲做埋氣功助教，佢話一向宗旨就係唔止要學會，仲要學得精。

尋日中銀香港向一班大學生頒贈獎學金，二百幾個香港嘅大學生坐定定聽David分享經驗，大學生問嘅問題都相當正經，有人問中銀香港業務策略，有人問佢乜嘢質素嘅人應該入銀行工作，睇落似係成班大學生齊齊面試見工呢！好多學生應該都想知，如果要去中銀面試見工有乜貼士喇，因為今日中銀有招聘會，如果David可以分享一招半式見工策略，咁就最好嘞！

余絲韻