本文重點
好多媽咪最開心就係見到仔女茁壯成長，自己可以功成身退。好似3年前由香港調去上海擔任星展中國副董事長兼行政總裁嘅林劉淑英咁，好快就會調去另一個職位，佢話依家星展中國班同事已經大個仔，可以再分工，相信佢見到星展中國總部「星展銀行大廈」終於落成一定好安慰。
負責星展北亞策略
林太仲講笑咁話星展中國呢度唔需要佢喇，其實只係帶大咗個小朋友後，自己唔使再咁困身啫，佢話好快就會返嚟香港同大家見面，佢雖然唔肯講新工作職位，但佢話會負責北亞地區嘅策略工作。幾時正式調任？就要等中國監管當局正式批准依家候任行政總裁張在榮先得喎！
講番位於陸家嘴中心嘅中國總部大樓，樓高18層，星展中國租咗5層所以有命名權，租用面積約1.33萬平方米。上海嘅團隊都會聚集喺呢度，聽講喺唔夠3年時間，星展中國客戶群增長超過4倍，員工人數增長一倍至近1,000人，認真威水，當然全靠林太領導有功啦，所以見佢都冇乜不捨之情，仲好似對新任務好雀躍添！
余絲韻