內銀唔係話買就買

霍嘉治尋日畀人問會唔會買內銀之餘，仲乘勢問埋佢哋喺內地準備買乜？絲絲見佢畀人係咁追問後，終於忍唔住開始「教書」，話內地限住外資投資內銀，係唔可以持有超過兩成股權，呢個係現實，而記者報道一件事之前，真係要搞清楚現實環境先。

雖然霍嘉治一直唔肯斷然否認「大笨象」買紅色錢莊，但係佢咁講得，大家都應該明白，喺內地監管條例入面，現階段邊有可能吖？佢咁講一講，現場追問氣氛即刻輕鬆咗，其他傳媒朋友亦好識趣，唔再繼續追問。

「大笨象」一直都想增持交行（03328），奈何阿爺暫未放寬規例，佢哋一直都好有耐性，強調交行係佢哋喺內地重要嘅基礎投資。喺交行呢項投資上，霍嘉治深明好多政策係冇得急嘅。

余絲韻