本文重點
常言道：「食得是福！」唔少城中名人除咗識搵錢，亦都識飲識食，余錦基肯定係其中嘅表表者，不過絲絲日前喺中環見到基哥，發覺佢清減咗唔少，不禁問個究竟，原來一切都係為健康着想。向來為食嘅基哥話，早排醫生同佢做檢查後發現，佢嘅血糖超標，而且唔係一般超標咁簡單，而係超標到再唔改善，有機會搞到腎衰竭，真係唔講得笑，所以基哥為自己同家人着想，最後都要聽醫生嘅勸戒減肥。
血糖超標 做Gym節食
佢用咗一個月時間就減咗11磅，對於向來具分量嘅基哥嚟講，效果已相當明顯。絲絲細問基哥有何妙法，原來都靠一般嘅做Gym及節食，為食到喺中環辦公室隔籬自設私人飯堂嘅佢話，原本都擔心自己忍唔到口，點知原來係得嘅。至於仲使唔使繼續減？醫生話只要Keep住依家嘅體重就得嘞。
記得早前基哥因為血管栓塞而入院「通波仔」，順便辭埋漢傳媒（00491）主席職位，絲絲諗住佢從此會退休享福，點知基哥話佢近期又有嘢諗緊，仲話係同科技有關，不過佢話主要都係搞方向性嘅嘢，尤其係科技嘅嘢，長遠都係交由個仔主理喎。
余絲韻