在港首年要先減10磅

仲記得紀勤第一日返滙豐總行辦公室時，成班員工夾道歡迎佢，場面好鬼熱鬧。紀勤初嚟甫到，中國人嘅社會又熱情好客，應酬食飯當然唔少得，絲絲估有大把冼塵宴等住佢。

不過佢話之前喺倫敦工作咗6年，依家要減番20磅喎，第一年就唔好咁辛苦，減住10磅先啦。

香港一向係美食之都，聽講紀勤仲好鍾意食中國菜，唔知美食當前佢忍唔忍到口呢？絲絲記得，金管局前副總裁韋柏康及滙豐前大班邵銘高嚟咗香港之後，身形都發福唔少！

紀勤第一日返工，連張大班椅都未坐暖就要親自出馬，為一班小朋友講解理財知識，真係盞鬼得嚟又認真。佢去咗銅鑼灣李陞大坑學校向一班9至10歲嘅小朋友講課，當然同行仲有佢位夫人紀芝蘭啦，紀勤好認同理財教育係相當重要，仲話頭一日返工就可以參加咁有意義嘅活動，真係難得，佢話想為社會做多啲嘢，我哋就拭目以待睇吓由佢帶領嘅滙豐嚟緊有乜新搞作。

余絲韻