眼光應放遠啲

呢本書叫《馬路學》，內容大致講由駕駛同交通引發嘅心理學及社會學問題。作者Tom Vanderbilt參加一個由前F1賽車手任教嘅駕駛技術改進課程，其中一句口訣係「Look where you want to go！」無論路面有乜嘢突發事件，最佳反應係望實你要去嘅方向。甚至有研究指出，當有車突然衝出嚟，閃避不及往往係因為注意力畀呢架車吸引住，當你懂得望住路面上空間，避開嘅機會就大大增加，所以眼光應放遠少少，望住目標。

自上月底恒指喺高位回落後，發現當恒指跌時，恒指Call輪街貨反而上升，Put輪街貨就減少；當恒指反彈，Put輪街貨又急彈，Call輪街貨即刻減少，反映股友睇錯邊，又或者啱與錯都急急沽貨獲利，可能「順勢而行」真係講易過做啩！

《馬路學》仲有幾個重要概念對投資或做人有提示作用，書中話人通常高估自己駕駛技術，覺得揸車比人哋叻，無形中提升意外機會率；仲有人經常錯誤評估風險，例如看似安全嘅道路，往往因為低估其危險性變得意外機會大增。以上觀點可以點樣應用喺投資，你可以自行領悟。

其實人真係好易做錯決定，書中話好多司機喺大霧中行車都會拉遠與前車距離，覺得會安全啲，但事實應該要緊貼前車，因為霧中能見度低，如果與前車距離遠，反而容易唔知前車情況，到見到前車時往往反應唔切。唉！呢個會唔會係我哋需要「股神」、「四叔」及策略師等人物嘅原因呢？

大健