本文重點
提起冼國林，相信大家除咗會記起永亨財務外，仲會聯想到佢功夫了得，洪拳、太極、詠春樣樣皆精，早前佢仲出錢出力投資拍《葉問》呢部電影，結果叫好叫座。但大家可能估唔到，現為第一信用財務主席嘅冼師傅原來文采都相當唔錯，好快就會出書。
親身經驗結集成書
冼師傅呢本書名為《笑看江湖》，絲絲起初以為係冼師傅行走江湖多年來嘅一啲點滴，點知原來本書主要係講市場學、財務管理、人際關係等，大概以40篇散文形式結集而成，全部都係冼師傅親身嘅經驗。咁又係喎，市場學呢家嘢，親身經驗最重要，好似冼師傅話有一次被邀向一班讀緊MBA嘅同學演講，但竟然被質疑佢唔夠班，話大家都係MBA，點解要聽冼師傅講嘢呢？結果冼師傅就實行「見招拆招」，佢係用自己失敗嘅例子同大家分享，因為用自己親身失敗嘅經驗係最具說服力，而且冼師傅仲懂得喺失敗中學習，從改善而達到成功，咁樣嘅經驗，絲絲相信MBA嘅課程係無得教嘅。
余絲韻