傑仔十指搶包山阿智磨到直不甩

草蜢三子前晚首場開騷，吸引不少圈中好友捧場。台上三子除了換上多套靚衫，包括透視及貼身剪裁，不經意晒肌兼晒麒麟臂，當然亦少不了連場火辣演出！蔡一傑與性感兔女郎互咀又互摸胸，還上演「人肉三文治」，場面火辣辣。蔡一智與蘇志威（阿細）則與SM造型的艷女郎貼身廝磨，期間艷女郎更趷籮讓阿細「摸股」！

相約粉絲唱到火星

演唱中段，阿智有感而發：「我想講草蜢都有個夢想想分享，就係喺宇宙另一邊仍然為大家開演唱會，去到火星、去到木星，大家會唔會依然咁熱情？係咪都係咁興奮？咁我哋約定2085年喺火星繼續開騷！」舞台隨即轉以太空為主題，三子連唱多首經典快歌，而2085年正是草蜢成軍100周年，難怪他們相約「鐵粉」到火星開騷。

傑仔伸手「搶包山」！	阿智貼身廝磨後當堂直晒……講條腰咋！	蘇志威摸Dancer屁股，笑言濕濕碎。

完騷後，傑仔被問到是否膊頭受傷？他說：「係Chok傷咗，手揈到某個角度就去唔到，但冇問題，會撐住落去！我仍然跳得好堅嘅。」阿智在旁笑說：「跳到腳都斷！（你腰傷點啊？）你哋覺得我有問題咩？（就係冇？）係囉！冇事，我仲做咗好多次彎腰，見到啲兔女郎冇晒事，成個人直晒！」傑仔自爆被兔女郎錫到滿嘴唇印。講到傑仔向女Dancers摸胸？他笑說：「係十指『搶包山』！」至於阿智與阿細有股摸，阿智堅稱借位，阿細則說：「摸Pat啫！」傑仔笑言看到觀眾席有人睇到流鼻血。另外，傑仔指一如以往選唱師傅梅艷芳的一首歌，相信她知道三子仍很掛念她。

草蜢三子與粉絲握手。

傑仔着透視戰衣，肌肉若隱若現。

文：音樂組

攝：吳文聰