青雲搭啱線吹到做「總統」

畀郭藹明鎖喺屋企？

只有劉青雲嗰種天跌落嚟都話之你嘅態度，先最有資格講呢句「又點播？」，正如最近網上流傳佢同老婆喺茶餐廳開餐嗰張偷拍相，講真，「又點播？」但唔少網友係咁轉發，Nuts哥明嘅！事關青雲雖然有「我們的影帝」嘅美譽，聽落好親切，但佢更出名嘅係「神隱」！你想「野生捕獲」佢？得！但情況會似提名過金像獎「最佳男主角」十六次，但至今只攞過兩次嘅青雲咁，每一次都得來不易，苦盡甘來！唔少人甚至以為佢平日係被郭藹明鎖喺屋企唔畀出街，否則點會次次唔使開工，蒲親頭都係同老婆一齊咁滯？

早兩年導演杜琪峯喺跑馬地擺大壽，青雲兩公婆突然現身，現場班記者直頭有航天員訪港嘅感覺：「『西貢朋友』劉青雲唔係只會喺西貢出沒o架咩？最多咪去九龍城買雞，仲要係新正頭喎，原來佢會過海o架？稀客呀！」只怪青雲真係太神隱，就好似天空裏的一片雲，偶然投影在你的波心，你點止訝異，直頭「思」裂！所以咪發生有人喺上海「野生捕獲」咗佢兩公婆，都唔敢相信自己眼睛，於是配上「張學友夫婦」嘅圖片說明囉！

茶記Gag王唔木獨

青雲係個提名十六次影帝，得兩次攞到，都唔係好樂意再約出嚟做訪問嘅人，平時為電影宣傳，職責所在冇得好講，但其餘時間佢真係揸咗架太空船唔知去咗邊o架！佢老死黎耀祥就最清楚佢：「劉青雲肯做訪問？佢唔係好憎做訪問o架咩！」

但與其話青雲太收埋自己，不如話唔明白佢神隱背後真身原來都係吹神嘅人太多！曾經有圈中人話青雲「冇多餘嘢講」，但事實係佢仲多嘢講過郭藹明，所謂話不投機半句多，你咪覺得佢木獨囉！Nuts哥就曾經聽過佢講解自己嘅英文名：「我係好唔Sean嘅Sean，但Sean Lau，『上流』嘛！」你睇青雲幾識搞Gag，點算係木獨佬呀？

青雲唔只生得黑黑實實，仲唔係好傳統靚仔嗰款男一，佢對啲唔正路嘅對答情有獨鍾！郭藹明當年初次約會，話：「我以為你（青雲）想借錢咋！」，就令青雲留下好印象！吳鎮宇個仔嗌青雲做「總統叔叔」，直頭將佢同美國前總統奧巴馬畫上等號，青雲不知幾冧冧豬！所以話，青雲係咪悶同冇嘢講？睇吓對住邊個啦！