朱千雪送首飾孝敬媽咪
女神朱千雪與醫科生男友Justin經常分隔兩地，冇男友相伴的她日前收到媽咪急Call，隨即做孝順女陪行街，兩母女現身珠寶店揀首飾，眼見媽咪揀得心頭好，乖女千雪亦相當識做主動付款！
前港姐季軍朱千雪，早前突然爆出有一位在澳洲修讀醫科的有米男友Justin Ng，二人經常分隔兩地，雖然只靠視像和短訊維繫感情，但仍然愛得甜蜜。沒有男友相伴的日子，千雪BB都不愁寂寞，日前就做孝順女陪媽咪行街Shopping。當日下午約4時，千雪BB獨自駕車離開小西灣寓所前往太古城一商場，泊好車後，戴黑超、穿淺色上衣襯牛仔短褲騷白滑玉腿的她，拿着咖啡邊行邊飲，期間不時撳電話兼錄語音短訊，之後去附近會合媽咪，其後雙雙走進一間珠寶店。
手指指坐低試
甫進店內，千雪BB與媽咪分頭行事各有各睇，之後再企埋一齊研究，睇完耳環再睇手鏈，男職員在旁熱情招呼，兩母女不時隔住飾櫃手指指向職員詢問。朱媽媽好快就揀了幾件坐低慢慢睇，乖女千雪亦在旁給予意見，未幾媽咪便揀得心頭好，而千雪BB亦非常識做負責找數，並手持戰利品離開。
途人眼望望
買完首飾給媽咪，兩母女在商場逛了一會便分道揚鑣，千雪BB隨即往停車場取車。雖然已戴黑超，但穿上熱褲的她卻難掩身上一股女神氣質，沿途仍有不少人認出兼眼望望，女神果然魅力非凡！
文、攝：追蹤組