迪子險毀容撞甩牙縫23針
歌手鄭欣宜與迪子日前不約而同在外地受傷！欣宜跌斷腳要做手術，非常擔心影響跳舞和開騷，在醫院泣不成聲！而迪子遊韓期間跌倒撼鋼櫈，不僅手部一度不能郁動，部分牙齒更撞至飛脫，嘴部縫了足足23針，差點毀容！
歌手迪子10月底與一名女性朋友到韓國旅遊，沒料到行程第一天竟在餐廳發生意外，跌倒撼落鋼櫈，撞到甩牙，血流如注，臉部及手腳同樣擦傷及撞瘀。為免傷口惡化，迪子盡量忍住不哭，但受訪時重提得到不少人協助，終邊哭邊說：「我朋友都受咗傷，因為我隻手畀張櫈壓住，佢見到我成身成地都係血，幫我移開張櫈。但之後張櫈就壓住佢隻手指，依家要打石膏。」迪子透露意外後自己雙手一度不能移動，很擔心不能再彈琴影響生計。
執番啲牙「救」得番
嘴部縫了23針的迪子，選擇留在韓國拆線，並坦言很多謝當地的醫護人員，雖然言語不通，仍盡力幫忙：「除咗幫我止血，仲幫我執番啲牙。我兩隻門牙係原隻飛出嚟，好彩根部冇斷，同埋我哋好快入醫院做手術，神經壞死之前救得番，放番喺原位，但可能之後要做杜牙根，同埋有機會做牙套。其他啲牙有啲崩晒，可能要種牙。」她憶述在救護車上，用僅餘的力氣傳訊息給弟弟，請他代通知原定10月31日的騷要取消，又因不想媽媽擔心，故希望樣子回復九成才通知她。
迪子現時每日輪流冷敷及熱敷面部消腫及散瘀，醫生指她復原得很好，但日後嘴唇可能有疤痕，要靠化妝遮掩，她說暫時只能吃流質及軟身食物。
體會到韓國人情味
由於迪子沒必要住院，因此意外保險的賠償並不多，醫療費方面她表示不想講。對於要延期或取消工作，她感謝各方體諒，只望盡快康復。另外，她又感謝在韓國照顧她的民宿女員工及老闆：「喺韓國整牙同拆線好平，但返醫院洗傷口就好貴，嗰幾日都係靠呢個女仔同我洗傷口照顧我，好多謝佢哋。」
文：音樂組