楊明硬接高Ling飛撲 手軟嗌暈
高海寧與楊明昨日為新劇拍攝激咀戲，連番飛擒撲向楊明，考驗對方腰力與腳力。雖然站穩以曲身迎接，但他抱多幾次已吃不消，加上連番轉圈激咀，難怪事後嗌頭暈。
無綫「咪神」高海寧（高Ling）與楊明昨日在大欖為無綫劇集《抱佣情人》拍外景，劇情講述高Ling刑滿放監，高Ling與楊明夫妻重聚時即刻飛撲擒着對方，「熊抱」到楊明實一實！其後，兩人來個360環迴激吻，咀到天旋地轉，難怪楊明事後大喊頭暈。
工作人員勸戴腰封
拍攝時，楊明要多次抱實飛撲過來的高Ling，雖然準備穩固馬步、曲身迎接對方，但抱了五、六次後明顯有點吃不消，手軟軟幾乎抱不起她！問到是否因高Ling太重而感吃力？楊明說：「工作人員講笑嚇高Ling，叫我接嗰陣睇住條腰，其實佢唔係好重！佢已經成日節食已經好瘦，實情係因為轉咗幾個圈，又要望住鏡頭，所以我都暈暈哋。」成功瘦身比選美時還輕磅的高Ling自我平反，她笑說：「我直情輕磅啦！啲工作人員叫佢戴腰封，係咪真係咁危險呀？搞到我都唔敢全力跳上去！」
錫完黐立立 急抹嘴
提到與楊明連咀多次，還咀到要用紙巾抹嘴，高Ling笑說：「唔係抹口水，因為楊明啲化妝黐咗落我塊面度，之前拍《單戀雙城》咀戲時發現到呢個問題，所以會注意，唔想上鏡塊面烏卒卒。」問到拍激咀戲可會感尷尬？她說：「初時都幾尷尬，我好少拍咀戲，但呢套劇好多，拍拍吓已經習慣咗，同埋投入咗角色就唔會尷尬。」楊明則說：「拍耐咗OK，碎料啦！」
文：影視組