林峯嫌棄千語揀盛君做老婆

林峯與黃百鳴力捧女新人盛君在靈異電影中飾演夫妻，首次擔正的盛君表示全靠林峯幫她入戲，大讚對方有好老公感覺。林峯亦覺她比女友吳千語更適合演其妻子，並表明抗拒將私人感情事搬上大銀幕。

早前榮升華鼎獎視帝的林峯，在影壇方面亦不斷作出嘗試，曾拍過武俠片及愛情小品的他首次演出驚慄電影《3D詭嬰》，與內地女新人盛君飾演夫妻，經歷不少詭異場面。由於吳千語演盛君胞妹，外間焦點難免放在「峯語戀」上。不過林峯大讚盛君比千語更適合演其老婆：「盛君基本功好好，而且外形成熟啲，似係結咗婚嘅人。千語個角色比較男人頭，佢本身性格都好爽直，選角係好啱。（覺得千語演技有冇進步？）我都係新人咋！導演梁普智好資深又好人，佢會教。（再同千語合作？）唔想，覺得唔需要刻意，私事應該同工作分開。」

自認細膽少睇鬼片

自認細膽的林峯笑言很少入場睇鬼片，今次要到大嶼山一所偏僻大屋拍攝，可算膽量大考驗：「我睇恐怖片好易嗌，但又唔好意思嗌出聲，不過拍戲想不停試新嘢。間屋經過布置同燈光真係充滿陰氣，睇playback已經feel到，出嚟有3D效果一定更加震撼。（遇到污糟嘢？）咁又冇，我細膽，去廁所都要等有人去先去。係有次突然隻歌自己播放，有啲奇怪，但呢個好小事。」他又透露片中穿拖鞋在石地奔跑而弄傷腳趾公，至今仍不能彎曲，而另一場與徐子珊的水底吻戲亦很難忘。