志偉誓不留任 學友嘆失人才

演藝人協會會長曾志偉前晚突然請辭，秘書長陳芷菁昨早就連同會員王祖藍、阮兆祥等人召開緊急會議，旨在挽留志偉。約十時許，主角志偉終於現身，問他可接受挽留？志偉就好決斷話：「唔係啩！我只知道係茶敍，唔好玩啦，就算挽都唔留。」其後志偉又口快快「爆響口」，話稍後會開會傾梅艷芳的紀念騷。

飛蛾一齊開會

記者上到志偉所講的音樂室，現場所見除了「歌神」張學友、梅姐生前經理人王敏慧、歌迷會會長蘇小姐及美指奚仲文等人外，更有一隻飛蛾靜靜的伏在牆上，一齊開會。

志偉決斷揚言：「挽都唔留」。

秘書長陳芷菁昨早就連同阮兆祥等人召開緊急會議，希望能勸服志偉留低。

問到學友是否計劃大搞梅姐紀念個唱？學友就大方承認會「有嘢搞」，至於是否開個唱就要視乎其他因素，是否預計在梅姐的死忌時候舉行？他坦言：「其實搞得嚟都12月喇，但一切都未有場，未有日子。」學友又話本想拉埋陳奕迅「落水」，奈何對方沒空出席。

提到志偉辭任演藝人協會會長，學友就話：「想留佢，好難得有佢咁嘅人才，又玩得又做得，非佢莫屬。」至於11月8日演藝人協會的慈善晚宴點算？學友相信志偉並非「冇頭冇尾」的人，深信他會處理妥當。

校長感性留言

另外，譚詠麟昨日就在微博力撐志偉話：「送一首改裝版《無奈》撐你：你本應想要淡然去，無奈此去不易，看着你一臉茫然與眼中困惑，瀟灑的轉身去！做你覺得舒服的事吧，志偉撐你。」又勁感性留言：「有多少人會明白志偉感受？！！」

文：音樂組

採：影視組