樂瞳認Dry擔心冇人吼

有甜姐兒之稱的糖妹（黃山怡），早前被本報獨家拍到與Dominic拍拖，相當甜蜜。去年與糖妹被封為宅男女神的樂瞳，坦言羨慕對方覓得真愛。她說：「佢就好啦，我羨慕架！近排身邊好多朋友都有拍拖，見到其他人咁幸福，自己少不免都擔心。」

問到擇偶條件是否首要大隻靚仔？樂瞳說：「我對靚仔又冇特別偏好，外表唔重要，溝通先最重要。」提到糖妹因密冚戀情而被封大話妹，樂瞳即為對方說好話：「咁佢都係維護戀情，畀着我都唔會公開，我都想保護戀情同愛人。（有心儀對象？）依家Dry到爆！」

與蔣家旻老友

另外，樂瞳於新劇《當旺爸爸》飾演嬌生慣養的女生，與「父親」夏雨、鍾嘉欣、麥長青及無綫小花蔣家旻等有不少對手戲。她笑稱：「我嘅角色係唔捱得、唔做得，等屋企開飯嗰隻，恃寵生驕。」樂瞳還自爆於劇中經常穿短褲，她說：「希望網民口下留情同手下留情，言詞唔好太激去傷害我，我會努力keep fit。」

問到會否擔心與蔣家旻比較？樂瞳說：「我哋大家係訓練班出身，有共同經歷，知道是非嘅嘢避免唔到，大家私下係好朋友就唔使擔心。」

採訪：戶冊平

攝影：沈健程

服裝：Miss Sixty

場地：gi+