最近大家嘅注意力一定都放晒落特首選舉上，做特首最需要具備啲乜嘢條件，相信大家都有各自嘅答案，而最近日本有成人雜誌就訪問咗過百位風俗孃，問佢哋心目中最佳店長需要有啲乜嘢條件，可能結果對大家有所啟發都唔定。
有後台。囡囡話邊個做店長都唔緊要，因為佢都係要向老闆負責，如果得到老闆歡心，佢哋就會好過好多日；另外做到下情上達，將囡囡想要嘅嘢反映畀上面，比乜嘢都緊要，乜情況咁似我哋香港選舉特首嘅？
有魅力。囡囡話個人魅力都好重要，特別係管理囡囡，因為當中乜嘢人都有，如果你冇個人魅力，都幾難搞得掂啲囡囡，若然只靠大聲夾惡，對新一代嘅囡囡已經冇用，所以一定要識得人情世故，發揮到領袖魅力，咁就大家都會支持佢。
有實力。囡囡話店長要做好多唔同嘅工作，有時人手唔夠仲要自己落手落腳處理，所以一定要有好嘅工作能力，有啲店長乜都唔識，旨意晒人哋去做，自己就懶到死，萬一遇上突發事件，唔識得處理都係其次，只怕會影響埋囡囡嘅安危。
有承擔。囡囡話佢哋都算係偏門工作，好多時都有大大小小嘅麻煩事找上門，所以如果店長冇承擔，有事就閃，保護唔到佢哋，咁真係幾頭痕架！另外，講過嘅嘢要算數，唔可以冇口齒，否則成日出爾反爾或者一時一樣，咁真係令人無所適從。
撰文：賢