對於有女仔被冒名模特兒公司騙取影內衣照及裸照，一眾模特兒大表驚訝之餘，紛紛提出防範方法：
諸葛紫岐：「首先我唔會影內衣照，連泳衣騷都唔會接，通常大公司唔會要求啲女仔email呢啲相，只會幫你度晒身材，如果你隨便畀相人哋，人哋可以用你張相做任何嘢，你都告唔到人，所以要特別小心啲，我覺得依家啲女仔比較單純和急進，驚冇咗個機會。」
陳嘉容：「呢件事幾嚴重，但其實有得防，睇當事人夠唔夠聰明，任何一間公司唔會叫你send內衣照畀佢，泳衣都有機會，所有嘢無論大公司細公司，任何事要double confirm，唔好咁隨便，要check吓公司背景。逢叫你畀錢及叫你影內衣，你要即走。」
莊思敏：「個女仔做法好啱，有懷疑要問，send email一啲都唔安全，網絡世界唔可靠，就算官方平台都好多員工開到嚟睇，唔認同呢啲手法，有需要就上公司問，自己有權話事，一係就上公司即場影。」
姚予晴：「咁大件事？陰功，其實應該先打去問一問，一間正經嘅公司係唔會要求你send內衣照過去，之前我哋都成日企出嚟講，凡事要問一問，依家啲黑客幾勁，咁都諗到，冇陰功。」