Baby師妹招募黑客呃裸照
近期接連有不法之徒欺騙無知少女，逼其拍攝不雅照片。最新受害機構就是名模熊黛林及Angelababy的模特兒公司，昨日經理人兼總監Kim已報警處理，更立即召開記者會，以正視聽，免更多少女中招。
昨日下午三時半，Style International Management總監Kim在公司舉行記者會，她表示公司過去三年均與海港城合辦模特兒比賽Style Model Hunt 2011@Harbour City，過去三年都很順利，唯獨今年有不法之徒以黑客入侵公司網頁，並自製相似的郵箱及電郵地址發放email給兩名受害人，要求兩人寄上內衣及裸照，兩女感奇怪遂致電Kim才揭發事件。
Kim說：「我覺得事態嚴重已即時報警，因為其中一個女仔已經上咗一半當，（咩叫一半當？）佢寄咗張着住內衣嘅相去，不過就cut咗自己個頭。我有同佢通過電話，佢都好緊張，咁我都有安慰佢，我希望警方同傳媒可以幫手，唔想再有女仔上當，我依家都擔心緊仲有其他受害者。」
有權拒絕無理要求
Kim強調一般正當公司，絕不會要求女孩子拍攝不雅照片，她續說：「女仔想入行，都應該要有自己嘅底線，遇到奇怪嘅要求就要考慮；其實無論係咪model，作為一個女仔，只要個僱主提出唔合理要求都有權拒絕。（係咪model公司一定唔會要求對方着內衣？）泳裝同讀三圍就會，而內衣就要視乎個job係咪有關，（全裸呢？）我唔知其他公司，但我哋就冇要求。」
汪圓圓有尷尬經歷
而曾是Style公司旗下model的甄子丹姨仔汪圓圓昨為珠寶活動擔任示範時，表示希望舊公司可以盡快處理好事件，她說：「好多女仔一啲經驗都冇，好易信人，總之如果對方提出唔合理嘅要求，或者自己感到唔舒服，就要識得保護自己，（有冇試過不快經驗？）試過同個客溝通有問題，去到casting佢哋要求一啲比較尷尬嘅嘢，但我為咗表現專業都有照做。」
昨日Kim及Angelababy也即時在微博上更新，二人均強調其公司是不會要求女孩子拍攝不雅內衣及裸照，其中Baby更呼籲女性別上當，要提防不法之徒呢！
文：名人組