Be White Back
今個春夏白色強勢回歸時裝舞台，各大時裝設計師紛紛力捧，一眾藝人名模不論男女都爭相演繹白色新裝，散發一股清新魅力。名模陳嘉容（Eunis）就大讚梁朝偉穿白色Tuxedo靚仔出眾，渾身充滿男人味，令她留下深刻印象，而容祖兒一身白襯黑飄逸有型。
Angelababy
「成個Look好靚，配合到佢嘅Style，好有春日氣息，淨係得花環、裙同Platform鞋三樣嘢，好簡單已經好靚。」
陳嘉桓
「老氣得滯，佢得18歲咁細個，呢個打扮太成熟，佢應該着得Young啲，同佢年紀符合嘅衫，青春係好珍貴，有錢都買唔到，唔好浪費咗咁寶貴嘅本錢。」
鍾舒漫
「唔好睇，太多Accessories，令人眼花繚亂，唔好着呢件恤衫裙，改着白色貼身背心短裙會型啲同後生啲。」
Janice Man
「條裙本身好靚，鞋都合格，最可惜係佢襯咗條咁嘅燈籠三角骨褲，再加埋件背心，好怪好累贅。反而愈簡單愈靚，愈突出到個人品味。」
容祖兒
「Nice！Joey一向着衫都好好睇，而且係愈嚟愈靚，無咩失手。條白色雪紡裙型得嚟幾飄逸，成個打扮令人賞心悅目。」
何超蓮
「好Girly，女仔得嚟又高貴，將頭髮放咗落嚟，就唔會顯得太成熟，再襯對Colourful嘅露趾鞋，感覺會比密頭鞋Young啲同埋Casual啲。」
梁朝偉
「好靚！令我有好深刻嘅印象，一般嘅Tuxedo都係黑色，呢件白色Tuxedo綑黑邊就與別不同，偉仔着得好好睇，好Man好有男人味，黑色Bow Tie同黑色褲嘅配搭好好，更加突出到成個Look。」
陳嘉容Profile
陳嘉容，香港著名模特兒。曾為各大國際品牌行時裝騷，在時裝界打滾多年，對時裝有深厚認識，無論是理論還是實戰都難不到她。近年為電視時裝節目擔任主持，化身Stylist教人配襯衣着打扮。