戴歷羅斯哥連臣鬥快
2011年NBA季後賽周日凌晨開戰，常規賽一哥公牛打頭陣主場撲擊溜馬。正所謂擒賊先擒王，東岸八號種子溜馬想上演「黑八傳奇」淘汰公牛，最關鍵就係要減低戴歷羅斯嘅活動能力。負責防守羅斯仔嘅「二年生」哥連臣，賽前竟輕視呢位常規賽MVP大熱門，指公牛成績好並非羅斯一人功勞。（now 678、有線62及165台周日凌晨1時直播）
上季打入最佳新秀陣容，可惜因為與「蜂王」基斯保羅撞位，哥連臣季初慘被黃蜂送往溜馬，但因禍得福，哥連臣在溜馬缺控衞下成功坐穩正選，平均上陣29.9分鐘，貢獻5.1次助攻及13.2分，係球隊嘅二號殺手，並已成為領袖格蘭加嘅最佳拍檔。
公牛9連勝可響頭炮
戴歷羅斯被譽為全NBA速度最快嘅球員，適逢哥連臣嘅最強武器，正正亦屬速度，所以兩位「快車」今場將會上演速度大比併。面對名氣較自己大一截嘅戴歷羅斯，哥連臣賽前未有認低威：「我知道所有人都在討論戴歷羅斯，認為佢係全聯盟嘅最佳球員，但我可以話你知，公牛有咁好成績絕非一人功勞，我就覺得係教練泰保杜改變咗公牛風格，防守先係公牛最強之處。」
雖然溜馬今季在常規賽4戰公牛1勝3負，對賽明顯不及對手，但論最近一次對碰，就以溜馬佔優。溜馬當時通過加時後以115比108贏波，仲斷咗公牛8連勝，就算戴歷羅斯轟入42分亦徒然。不過，公牛在常規賽尾段氣勢如虹連贏9場，相信揭幕戰擁主場之利下，都可以打開勝利之門。