離婚身家有得分 阿嬌搭嗲話好So 阿Sa尷尬：唔需要

Twins前晚在澳門舉行的《Twins人人彈起2010演唱會-澳門站》頻頻發生蝦碌事，阿Sa未受離婚困擾，狀態大勇與阿嬌大跳大唱，期間阿嬌跳到甩假髮，阿Sa亦跳爆衫。阿Sa透露Twins計劃明年推出國語專輯，口不擇言的阿嬌衝口而出說：「出到先啦。」擺明倒米，嚇得阿Sa大叫說：「啋！一定出得成。」當獻唱《女校男生》時，因換衫超時遲遲未上台，阿Sa道歉說：「多謝你哋包容，險過剃頭，呢套衫係新架，所以用好多時間着。」

介紹嘉賓玩陳蔡戀

適逢前日是阿Sa農曆28歲生日，阿嬌除送上生日蛋糕，更率領全場歌迷唱生日歌，阿Sa答謝阿嬌每年為她慶祝，阿嬌說：「有年發生咗件事。」隨即淚流滿面，阿Sa拍拍對方說：「得啦，心照！」並唱出《相愛6年》。當阿Sa介紹嘉賓關智斌和張致恒的Boy'z組合時，阿嬌取笑「陳蔡戀」說：「唔係Sun Boy'z咩？」阿Sa尷尬回應說：「係Boy'z呀。」

阿Sa被問到知否終審法院早前就離婚夫婦財產定下平均分配，她說：「係咩？咁又唔使。」身旁的阿嬌突然重複說：「咁你有So。」雖然她出於好心為好姊妹取回公道，卻令阿Sa非常尷尬，阿Sa耍手擰頭說：「我唔需要，我唔需要，正所謂好嚟好去。（你可能分到前夫半間唱片公司？）我唔想分我嗰啲。」當問到她為何不請男友陳偉霆做嘉賓？她冧笑說：「問公司啦。（有要求？）哎吔，遲啲先算，下一站計劃吓。」

Twins在澳門開騷，表現一樣落力。

Twins將cream搽在張致恒臉上，關智斌在旁陪笑。

「舊屎」沖走唔好提

另外，曾與方力申傳緋聞的阿嬌被問到知否對方與鄧麗欣同遊馬爾代夫？她說：「我都想去呀。（想同方力申去？）唔係。」由於方力申多次與女伴拍拖旅行均被撞破，問到阿嬌會否覺得對方很水皮？阿嬌大笑說：「唔回應。（方力申幫你攞過行李？）一單還一單，唔好挖番以前啲嘢。」阿Sa維護拍檔說：「『舊屎』都沖走咗。」