祖兒驚爆 遭抱抱摸髀
近日有錄音室負責人涉嫌強姦23歲女星，震驚整個娛樂圈！身為前輩的容祖兒及陳彥行昨日齊自爆曾遭醉漢抽水，前者慘遭摸大髀及擁抱，後者則被掃胸。祖兒提醒女士切忌飲醉酒兼提高警覺性：「要識閃同避！」
本報昨日披露一名23歲女星報警聲稱遭人強姦，事後警方拘捕一名涉嫌與案有關的錄音室負責人調查，而錄音室負責人獲准保釋候查。由於錄音室負責人曾與不少當紅歌星及藝人合照，報道刊登後引起各界關注，對此事議論紛紛，同時亦震驚整個娛樂界。
N年前坐事發梳化
祖兒昨日到電台宣傳國語歌《正好》，曾與錄音室負責人合照的她坦言有看報道，對事件非常震驚的她更第一時間與對方劃清界線。她說：「對佢冇乜印象，助手就記得佢。（你同過佢合照？）唔識佢，好多時綵排同錄音都有職員邀請合照。」
祖兒承認有去過案發的錄音室：「去過兩、三次綵排。（有冇見過事發張梳化？）我坐過呀，不過幾廿年前（很久之前）。」問到會否戥女事主不值？她說：「女仔唔好飲醉酒。（好似係女仔帶酒上去飲。）咁懸疑解開啦！尤其做女仔蝕底係自己，我通常係同班好熟嘅朋友先會飲醉。」有指案中男女是好朋友，祖兒慨嘆說：「就算識好耐嘅朋友，孤男寡女喺酒精影響下好易出事。」
問到有否遇上醉漢借醉抽水？祖兒大方承認：「有，通常男生飲醉特別熱情，拍吓大髀同Hug（擁抱）。依家我識閃、避同提高警覺性，最緊要唔好令自己唔舒服，唔好怕有失場面唔出聲，佢唔尊重我時，我亦唔需要尊重佢，所以女仔要識閃同避。」
陳彥行被前輩摸胸
同樣曾遭抽水的陳彥行昨日接受電台訪問時自爆十年前被前輩掃胸，她詳細講述經過：「嗰時我哋喺內地拍完劇坐船返港，大家喺碼頭道別，有個前輩男演員走埋嚟想摸我塊面，點知佢隻手有意無意掃咗我個胸兩次。」陳彥行坦言當時來不及反應：「當時我嚇到呆咗，事後諗番應該要鬧番佢。」
陳彥行又透露曾在電視城遇見「鹹豬手」前輩，由於有感對方不尊重她，故沒有打招呼。問到為何不報警？她說：「怕口同鼻拗！」當追問對方是何人？陳彥行為免被指造新聞，故不肯公開對方身份：「費事大家估到。」
文：音樂組