Sa霆夾口供 擺阿媽上枱
蔡卓妍（阿Sa）和陳偉霆（William）宣布拍拖後新聞不絕，昨日有報道指阿Sa於跑馬地買樓密謀金屋藏「霆」，但阿Sa澄清買樓只是送給母親，而William亦堅拒被「藏」寧願跟母親同住，二人分別擺阿媽上枱，果然有默契！
阿Sa和William這對熱戀中情侶昨日分別出席公開場合，身穿黑色連身裙的阿Sa獲唱片公司高層吳雨送上白金唱片祝賀，期間記者起哄要求吳雨吻賀阿Sa，嚇得阿Sa雙手掩臉，最後吳雨改為獻飛吻。事後阿Sa被問到William有否購買其新碟及背熟自己的歌？她冧爆表示：「你問番佢啦！（叫William幫你啲快歌伴舞？）幾好提議！（情侶檔合唱？）佢同阿嬌都合唱過，暫時想分開啲先，呢排夠多喇！」
冇去屋企過夜
阿Sa表示沒跟William提及結婚，因雙方不會談工作以外的事，她解釋：「嗰日嘅新聞我哋唔會攞番嚟講，呢啲都係工作！」對於有報道指她在跑馬地購買二千呎豪宅跟William築愛巢？阿Sa澄清：「間屋係我買畀媽咪o架，之前都講過，我一向都係自己租樓住！（諗過築愛巢？）冇諗過！」
至於穿上Bernard Willhelm潮服的William出席昂坪360活動時坦言得知阿Sa買樓，但他否認被「藏」，William說：「我咁大個人唔需要收藏，亦唔係金屋，去朋友屋企都會，何況係男女朋友，我一直住喺九龍塘同媽咪一齊住，冇去過佢（阿Sa）屋企過夜，亦冇去佢度住。」報道又指William九龍塘住所本來是他跟前度女友Angelababy租住，但阿Sa不希望William睹物念舊情而在跑馬地築愛巢，不過William斷然否認：「絕對唔係！我由細到大都同媽咪住，將來都係！」
廿四歲太早婚
另外，阿Sa日前表示仍未ready再婚，William聞言指冇問題，問到是否會等阿Sa ready？他說：「我要做好我事業先去諗呢啲嘢，24歲實在太早，絕對唔係適婚年齡！」
採訪：音樂組