深情對話：葉玉卿：識心靈豐足
葉玉卿——昔日艷星、今日富婆，財富造就她成為傳奇，還是因為她行性感都可以直奔成功路，嫁得好兼做慈母而成為傳奇呢？置身資本社會，卿卿未被融和，一切的傳奇，她說是來自一個Secret，這個Secret的價值，非金錢可換來……
記：記者 卿：葉玉卿
《The Secret》是一本書，兩年前成為best seller，全世界正掀起一股「think positive」之際，卿卿已視之為精神食糧，書中談到「Law of Attraction」，簡單來說信念會影響將來發生的事，正面想法會造成正能量。
畢生也受用
全港巿民正需要正能量，因備受天災、人為慘劇的影響，香港人思想負面得很，有錢人或許會多點方法解決，窮人只靠正能量思想來平衡。不過，卿卿打從19歲「身無分文」選亞姐入行，至嫁往美國做銀行家胡兆明（Jeffrey）的太太，更成為三個細路——長女胡芷茵（Victoria）、次子胡可聰（Jeffrey Junior）和孻仔胡以聰（Jeffreson）的「富媽媽」，這股正能量一直盤旋於卿卿腦海，低潮期用得着，過着幸福家庭生活，不愁柴米也用得着，因她將之用在兒女身上！「Law of Attraction」帶領卿卿思想正面，是以她身教子女句句鏗鏘，有時，她覺得自己也受用無窮。
記：三個仔女生長在富貴之家，家住古堡、出入名車、坐私人飛機，咁架勢，唔擔心佢哋養成不知足嘅心態嗎？
幸運變詛咒
卿：四年前帶個仔去Toy Store，嗰度成二千呎咁大，個仔行咗十幾分鐘，竟然話冇嘢買，我即刻問邊個講嘢？我當時就教訓佢哋，冇嘢買都講得出嘅？咁半年都唔好再去，因為你哋太幸運，我唔想將本來畀你嘅福氣、幸運變成一個Curse（詛咒），天會知道架！我教佢哋，擁有時都要感恩，如果我個仔女喺我教導下，當擁有好多，但冇滿足感覺、冇開心嘅話，咁我其實係害緊佢哋……我細個時有粒糖，可以自己飲一支汽水，已經好開心，嗰時我會覺得，一百蚊可以買晒全世界，依家就話一百蚊冇嘢，但只要識得去愛、去珍惜，先會識得開心！
記：好多父母以物質去彌補對孩子照顧不足，你咁富裕，問題就變成唔係問題啦？
卿：正因為富裕，我對仔女嘅身教更加小心同嚴厲，不時提醒佢哋要幸福就要學識心靈滿足，唔係物質填補，亦要學識人同人之間互愛，建立自信，以個體形式生存，唔好活喺「富貴家庭」嘅庇蔭下，朋友先會認識你，而唔係認識你嘅錢。
慘過喺地獄
記：小朋友會了解你教嘅心靈滿足嗎？用乜方法令佢哋明白真正有意義嘅人生？
卿：凡事我都好正面，唔畀自己壓力。好想仔女要有信心，就教佢哋講嘢要望住人哋對眼，咁先叫有禮貌有修養，我同仔女講，唔好以為錢係禮物，再多嘅錢錯誤處理，只會變成詛咒，當你有一日冇錢，就會慘過喺地獄。好似羅兆輝，佢破產後好慘……好多人會留錢畀仔女，但我留畀仔女嘅，希望係做人嘅態度，我唔知可以陪佢哋幾耐，所有人都會走，可能我明日就走，而今日我仲喺度，就講佢哋知兄弟姊妹要互相照顧，有血緣關係更加要互愛。
脫離娛圈為瞓覺
作為胡家的當家，卿卿要管理全家大小的身體及健康，近年她以中藥調理身體，早前舉家外遊亞洲，便帶備了兩星期的中藥包隨行。
卿卿在美光顧的中醫師，十多年前赴美國考試名列前茅，行醫後很多人慕名排隊光顧，她說：「我跟咗佢兩年調理身體，最有效係瞓到覺，我去咗美國每晚瞓唔到八個鐘，仲會醒幾次。可能係心理，我食完藥瞓得好好，以前拍戲就冇得瞓，我唔做呢行都係為咗瞓覺咋！Jeffrey（老公）有血壓高，睇完中醫都唔使再食西藥，佢背脊痛，兩年前開始針灸，一星期一至兩次，做完就冇痛，好神奇！」
文：影視組