君如食詐胡急尋代母
近日傳懷孕的吳君如，原來「食詐胡」，另一方面她的好友李嘉欣終於有喜，可謂各走極端，不過，已是一女之母的君如，直認「食詐胡」面容未見難受，還指嘉欣「人一世物一世，乜都要試」！君如亦收到「代母」的資訊，笑言甚有興趣幫襯。
吳君如、導演許鞍華和編劇楊漪珊，昨日到香港大學出席《得閒炒飯》公開講座，與大學生透過電影探討同性戀、雙性戀等社會問題。君如受訪時談到好友李嘉欣公布懷有逾三個月身孕時說：「消息見咗報後，我打咗電話恭喜佢，一路江湖揣測咗成兩、三個月，我都冇見過佢，亦唔鍾意八人哋啲嘢。（有教佢心得？）約咗佢下星期食飯再研究啦！唔好喺電話度講咁多女人嘢。（你哋同時傳有喜，佢有喜，你食詐胡？）係啦！咁咪好囉！佢係第一個，人一世物一世，始終都要試，我自己冇所謂，過咗暑假咪剪短頭髮重出江湖囉！」
拒絕人工受孕
剪短髮、穿上乾濕褸的君如，明顯比前纖瘦了一點。但記者笑她剪髮是「待產」，君如即哈哈大笑說：「待產就唔好，代母就得，有朋友畀咗啲代母嘅網頁我睇。（人一世物一世會唔會試？）都有興趣喎！唔使阻住自己，頭尾嘥兩年時間架！唔可以做自己想做嘅嘢，如果香港有代母就好！唔使去美國瞄住個代母，飛嚟飛去一樣使好多錢。（人工受孕？）傷身體，唔好搞。」
亨亨單拖做節
此外，李嘉欣在微博上載一張食早餐的照片，表示：「餓扁喇！起床後要馬上吃東西的我，手腳冰冷等了三個多小時才……」似乎胃口甚佳！而其老公許晉亨剛在昨晚與父母到福臨門食飯做節，相信嘉欣應是專心安胎而缺席飯局。
文：影視組