吳彥祖Lisa S.秘婚呃晒所友人

Daniel昨晚在個人網站上載與Lisa S.於本月六日在南非某森林中舉行婚禮的照片，更以「我依家係已婚男喇」來形容自己。而一年冇更新網誌的Lisa S.，昨晚亦有默契地在網誌宣布「我正式成為吳太」，雖然婚禮玩神秘，但不算馬虎。照片中的Daniel與Lisa S.均穿上整齊婚禮禮服，並邀請南非高人Monica任婚禮主持，兩人跪在氈上接受祝福，Daniel更忍不住哭了起來。

瞞住好友結婚的Daniel，昨日更形容婚禮是人生最難忘的一日，他表示：「我永遠都唔會忘記嗰日，還記得婚禮前一刻還大雨，但儀式舉行時突然放晴，很感恩。Monica嘅十四個徒弟亦有主持婚禮，佢哋唱歌跳舞，其中有位徒弟好似被催眠咁，話睇到我哋嘅將來。儀式完了之後，我哋返回村內食羊宴，真係好特別嘅一日。」

尹子維當伴郎

據知，這次南非秘密婚禮，全程由Daniel策劃，更出資包所有賓客來回機票及酒店費用，估計每名賓客使費約數萬港元。Daniel為了秘婚，決定不派帖，改為親口邀請賓客，有幸被Daniel邀請兼重視出席婚禮的圈中人，只得尹子維及Lisa S.的好姊妹Ana R.。

有份到南非觀禮的尹子維說：「我去咗南非一星期。（做伴郎？）可以咁講，個婚禮氣氛好特別，好難忘，part part都好感動，好榮幸被邀出席。我喺南非寫咗首詩送畀一對新人，仲朗讀埋畀佢哋聽。（佢哋會唔會喺香港補搞派對？）我唔講啦！」

連凱驚聞已婚

早前在Facebook不開名祝福一對新人的Ana R.，昨日亦統一口徑，大講南非婚禮：「當我知道要去南非，我執咗幾日行李。好難忘Lisa S.爹哋將個女交畀Daniel嗰幕，好感人！我眼有淚光，不過擰歪面唔畀Lisa知。」

反觀Daniel好兄弟連凱昨日得悉婚訊大表愕然，他說：「我唔係好信！我依家喺北京做，但一個月前同Daniel傾電話，佢都冇提過，遲啲一定屈佢請食飯。」而陳子聰與妻子何超儀亦不知Daniel已婚。

身為Daniel前經理人的陳自強亦同樣未被知會，他說：「結咗咩？咪好囉，恭喜晒。我一直都有同Daniel聯絡，直到呢個月頭佢去南非停咗。佢冇提過結婚，我都係啱啱至知。好吖！男才女貌。」

Lisa稱職人妻

此外，新婚之喜的Lisa S.前日被拍得與好姊妹Ana R.到時代廣場連卡佛女裝鞋部shopping。Lisa S.全程心不在焉睇實手機，大概為當一個隨傳隨到的稱職人妻作準備。

文：影視組