奮不顧身變粉身碎骨 嘉穎盲撐陳凱琳：咁都Make Sense！

前港姐陳凱琳（Grace）前晚為無綫《萬千星輝賀台慶》任司儀，期間卻把「奮不顧身」錯說成「粉身碎骨」，隨即被前輩鄭裕玲「糾正」，事後頓成熱話。昨日，Grace男友鄭嘉穎為新片《九龍不敗》開工，甫見記者即笑笑口，坦言前晚才由北京返港，雖未有太專注觀賞台慶節目，但亦有留意新聞。

坤坤：粉身碎骨攝鏡

對於女友失誤，嘉穎隨即護航：「佢冇讀過中文，啲四字詞語係亂用啲，平時傾偈都係中文、英文同普通話多，其實佢拍劇都有亂用四字詞語，唔係第一次！好得意喎，佢同我、我啲朋友好似黃智賢拍都講得好順，但用錯咗都唔知。（叫朋友睇住佢？）唔使我叫個個都會睇住！」談到Grace似乎不了解粉身碎骨的意思，嘉穎笑說：「佢講四個字就當係，但冇粗口在內，我返去同佢講！佢其實想講『奮不顧身』，咁都Make Sense啲，都有個『粉』字，接近啲。（Grace話TVB每個藝人都粉身碎骨為觀眾！）咁我咪粉身碎骨令大家開心緊，又奮不顧身，又粉身碎骨，意思都係盡力令大家有娛樂性！咁全晚個騷都幾好睇。（最好睇係Grace講錯嘢！）係咩？希望出年唔好係佢啦！」雖然節目中不時被擺感情事上枱，但嘉穎未有介懷。

陳凱琳講到藝人要粉身碎骨，嚇到丁子朗（右）呆一呆！	吳業坤不忘抽水，笑言要「粉身碎骨」攝入鏡。	鄭嘉穎指陳凱琳四個字就當成語，私下鬧出不少笑話。

對於男友踢爆講錯說話非首次，Grace接受電話訪問時說：「佢一路都好支持同鼓勵我，記得拍《翻生武林》時，姜大偉同黃智賢都笑我講啲對白好流暢，但佢哋聽唔明，其實係自己擺烏龍講錯詞語。」而吳業坤於Grace受訪時不忘攝入鏡，事後特別Cap低畫面放上網兼留言抽水：「粉身碎骨地攝鏡。」他昨日回應指人人都有失誤：「我成日都有啦！尋晚我不停攝鏡，最尾見到人影又攝吓，最緊要大家開心。」

高海寧同樣谷出巨咪，可惜心口有紗作遮掩，失色！	陳煒（圖）越Cup挑戰張秀文，自爆全靠「裝假狗」。	張秀文（右）

陳煒「墊」勝兩大咪神

節目另一亮點則是賣大包騷巨胸的陳煒，對於肚皮舞造型照被網友瘋傳，昨日現身新劇《幕後玩家》宣傳的她表示已預料外間大多注意其身材，問到老公有否捧場？陳煒說：「我今朝Send條片畀佢睇，但未覆喎！（係咪嬲咗？）應該唔會啦！但真係未覆喎！哈哈！可能仲喺度睇緊所以未覆！（身材好過咪神高海寧同張秀文？）冇可能！睇Size我簡直係越級挑戰，我係靠『墊』勝！」今日生日的她忙於開新劇，只能抽短時間與老友食飯慶祝。

文：影視組