發哥代求情：唔係做壞事
蔡卓妍（阿Sa）與鄭中基宣布正辦理離婚手續，成為全城熱話，影壇大哥周潤發也有留意，他認為阿Sa事業如日方中之時結婚，隱瞞也絕對有苦衷，望大眾原諒她，而曾是瞞婚過來人的樂基兒（Gaile）及森美，昨日亦分別表態。
剛完成英皇電影《讓子彈飛》拍攝工作的發哥，昨日與太太抽空出席活動。
又借用「真的假不了」
談到「Sa基」被爆已婚，似乎有隱瞞之嫌，問他會否覺得藝人講大話不對？發哥說：「我相信有苦衷，阿Sa喺06年結婚，當時可能係佢事業如日方中，驚失去fans，原諒佢哋啦！（係咪所有大話天王都要原諒？）有情人終成眷屬就由得佢，又唔係做壞事。（咁始終都要認？）講繼續分手？真的假不了，假的真不了嘅。（呢句嘢好似好好用！）啱志雲哥多啲。」
另方面，與黎明同樣秘密結婚的Gaile昨日為時裝品牌Isabel Marant 10春夏時裝騷擔任模特兒行騷，對Sa基被踢爆已婚一事，身為過來人的Gaile自言對此事並不知情，但她力撐Sa基說：「拍拖結婚好正常啫。我唔識佢哋，係人哋嘅私事，第三者唔方便講，佢哋鍾意點就點，覺得開心就得，應該尊重佢哋，佢哋想講自然會講，唔需要問。」
森美：絕配分開失望
同樣秘密結婚生仔的森美，以過來人身份說：「我都經歷過，明白藝人私生活畀人知道晒會冇安全感，講得少或唔講係好，我唔係偶像派，壓力冇咁大。」他支持阿Sa不公開結婚關係，因阿Sa始終是偶像歌手，選擇不公開對她的愛情生活也會鞏固點。森美還說：「當聽聞得阿Sa公開講同Ronald分手，我好失望，因為佢兩個係絕配，兩人都好開心、樂觀，同佢哋拍戲喺片場氣氛係好開心。（傳佢哋分手係煙幕？）我都希望係。」
森美又說藝人公開家庭身份，形象確實會比較鮮明，但對偶像派藝人而言始終會影響愛慕他們的粉絲，他說：「後生時見到單身偶像或鍾意嘅女仔，都會諗如果我女朋友係咁就好，呢個諗法係正常。」
另外，昨日Sa基在九龍灣國際展貿中心舉行記招，正巧日本男星玉木宏也在上址舉行演唱會，當時有不少fans在等候入場，包括江若琳與HotCha成員Crystal。江若琳更好奇何以現場這麼多記者，當獲悉Sa基同時段亦在上址開記招後，忍不住說：「咁精彩！」
文：影視組