袁彌明講送禮：下世啦！
無綫高層陳志雲被廉署拘捕，涉案藝人亦愈來愈多，繼有指不少藝人向高層贈送貴價禮物討歡心後，前日又有報道指一名女藝人，眼見電視台黑幕重重，挺身到ICAC舉報，並自薦做線人將有記號禮物贈予高層，被廉署拒絕。
「雙詩」斥流料
就此事致電多位女藝人，當中袁彌明認為有上述報道並不出奇，她說：「有啲人送完禮仲會自爆，以前人傳人我都聽番唔少。（相信有人送禮畀高層嗎？）公開嘅秘密，不過呢啲行行都會有，唔係香港唔使成立ICAC啦。（有冇慶幸及早抽身？）鬼地方早走早着，要我送禮，下世啦！送畀嗰啲高層，買手袋送畀我阿媽好過。」
李詩韻、唐詩詠就力撐公司，不相信屬實，更認為有關報道是得啖笑，李詩韻說：「梗係唔信有咁嘅事啦，咁誇張！公司咁多人要返工拍劇，個個都唔夠瞓好攰o架喇，仲邊有咁嘅心情去做線人呀，得閒瞓多啲好過啦！（有冇見過人送禮畀高層？）冇見過人咁做。」唐詩詠亦表示一個正常人不會這樣做：「拍劇就會有，可能大家期待事件會戲劇化發生，相信ICAC唔會接受人自薦。」
廖碧兒真假難分
廖碧兒對於報道所指表示不清楚，也不知道是否真的存在：「不過喺呢個敏感時期，好多報道都為娛樂大家而寫，唔知邊啲真、邊啲假。」此外，無綫外事部副總監曾醒明，對於有女藝人做線人一事，他說：「吓！有關所有傳聞都唔會回應。」
文：影視組