羽翹恐怖童年 食野味補身
性感組合Freeze師妹羽翹，小時候經常跟媽媽回鄉探公公，正所謂初生之犢不畏虎，羽翹笑言曾大膽嘗野味：「穿山甲、果子狸同埋田鼠都有食過，諗番起都覺得好恐怖！」
向來享受家庭樂的羽翹，小時候經常陪媽媽回東莞探親，因此她對鄉下的感覺絕不陌生：「細個成日同媽媽返東莞探公公，因為公公喺當地開咗間酒店，所以有時間就會上去玩。」羽翹最難忘小時候在鄉下食野味：「細個嗰陣三、四歲根本唔知咩係野味，大人話有益就試下，依家仲記得嗰陣味，質感就似雞肉囉！」她憶述當時滿街都是穿山甲、果子狸及田鼠等野味：「啲田鼠全部都冇毛，成隻掛喺度，諗番起都覺得好恐怖，依家大個咗梗係唔敢食啦！」
放煙花逗利是
此外，羽翹每次回鄉都必到太平林則徐公園摘荔枝：「喺香港好少機會接觸大自然，所以返鄉下就必定會去摘荔枝，仲會去動物園騎下鹿，啲鹿好馴好可愛，所以我騎上去都唔驚，仲覺得好有型添！另一個成日去林則徐公園嘅原因，就係因為嗰度近公公間酒店，啲大人冇乜新意嘛，所以咪次次都去囉，哈哈！」
羽翹指農曆新年回鄉最興奮，因為公公例必派大利是，她說：「仲可以放煙花添，啲煙花真係好靚o架，不過依家公公已經退咗休，所以都少咗返鄉下啦！」
文：音樂組