一連兩場《答案是……孫燕姿2010世界巡迴演唱會》香港站前晚於紅館開鑼，燕姿父母、王菀之、藍奕邦、任達華太太琦琦及趙世曾與女伴捧場。

孫燕姿的舞台設計美輪美奐，她與dancers站在升降台上表演。	放大圖片	燕姿情深款款唱情歌。

怕醜鬍鬚仔

身為燕姿男友的荷蘭籍「鬍鬚男」低調現身，雖然刻意與未來外父外母分開坐，仍被傳媒發現，面對眾多鏡頭，他表現無奈、進退兩難，孫父見狀主動上前拉走他，怕醜「鬍鬚男」只好跟住未來外父避入後台。

燕姿甫出場即以廣東話冧歌迷說：「你哋掛唔掛住我？」歌迷即大叫「我愛你」、「你好靚」，氹得燕姿興奮扭pat，全晚燕姿換上多套靚衫，縱使她抱恙上陣仍表現落力，大唱大跳連串快歌，之後她笑說：「我可以休息五分鐘嗎？」

燕姿邀得謝安琪（Kay）任嘉賓，兩人合唱《超快感》時，燕姿竟老貓燒鬚甩嘴，幸好及時執生，兩人更互笠高帽，Kay最後獨唱《雨過天陰》及《鍾無艷》，可惜一度走音，唱罷準備返回後台的Kay說：「有樣嘢好想講，當屋企人知道我做燕姿嘉賓，仲開心過我喺度做騷，真係大細超！」

孫媽媽	燕姿落力又唱又跳。	謝安琪（左）擔任燕姿的嘉賓。

佗證男賣相

由於散場時歌迷不願離開，燕姿在兩度encore下再次上台獻唱，全場歌迷high爆企起身，至十一時十五分完場。另外，記者發現一名掛有大會工作人員證件操普通話的男子，在散場時於場館後門向歌迷兜售燕姿簽名相，每張廿元，當記者舉機拍照，該男子即鬼祟以「賣晒」為由極速返回後台，主辦單位發言人說：「嗰個人唔屬於工作人員，唔明佢點解會有我哋張證，我哋搵緊原因。」

文：音樂組