陳法拉早前在鏡頭前露bra惹爭議，無綫竟然變本加厲，在節目巡禮中繼續灑鹽花，播出鍾嘉欣被人偷窺僅遮三點片段，再加徐子珊、謝天華半裸情慾戲，踩盡灰色地帶！
早前陳法拉在《有營煮婦》中除去上衣露bra的鏡頭，引起很大回響，廣管局接26宗投訴，指意識不良，不宜在合家歡時段播出。雖然外間猛烈抨擊，無綫一於好少理，只解釋為劇情需要，怎料前晚舉行的節目巡禮上更變本加厲，播出多段意識大膽的鏡頭，向在場逾千名廣告客戶大灑「鹽花」。
着絲襪衫打底褲
在預告片中，發現在新劇《囧探查過界》飾演g模的鍾嘉欣，在換衫時被人在門罅偷窺，鏡頭則借位影到嘉欣似冇着衫，用門間黑影遮住重要部位，意識非常大膽。不過，嘉欣認為劇情需要可以接受，她說：「我覺得意識OK，故事講個g模被人偷影，其實當時我已經打晒底，着咗件絲襪衫同打底褲，我覺得劇情需要冇問題。」
子珊天華鬥纏綿
另外一場大膽場面，則落在徐子珊和謝天華身上，二人為古裝新劇《武偈大師》赤裸半身火辣纏綿，場面香艷。子珊直言性感要睇劇本，她解釋：「只係拍節目巡禮，如果正式拍，我會詳細研究劇情係咪需要。其實我同天華都好保守，可以嘅話當然最好係點到即止啦。（古裝都需要咁纏綿？）古裝有古裝嘅服飾，其實我有着肚兜，只係鏡頭影到上半截，令大家想像空間大咗。」
文：專案組